新片開鏡搭尖沙咀街景 子丹霆鋒駁火㷫合合！
由甄子丹、謝霆鋒主演的英皇電影《怒火》，日前在片場搭街景舉行開鏡儀式，身兼監製及動作導演的子丹與演員霆鋒、湯怡、何珮瑜、吳浩康、胡子彤和黃德斌等出席；子丹火併霆鋒，槍戰連連，當日氣溫高達33度，火上加火！
一班演員為《怒火》開鏡，英皇集團主席楊受成博士親自到場探班，為工作人員送上雪糕消暑降溫，又大讚子丹、霆鋒演得出色！
二人受訪時表示：「我哋身處佔地4萬呎嘅戶外，呢度搭咗尖沙咀北京道同廣東道街景，非常難得，除咗拍廠景仲有實景拍攝，部分鏡頭會移師北京道，好難申請o架！近年港產片好難睇到。」
開槍日花幾十萬
《怒火》導演陳木勝跟霆鋒已經合作過5部電影，原來他跟子丹早年亦合作過，子丹說：「我同霆鋒已經十幾年冇合作，對上一次係《龍虎門》，之前就同陳木勝合作過劇集《洪熙官》、《精武門》……」霆鋒聽罷即說：「嘩！我之前有追o架！我都唔知道，that's cool!」對於片中槍林彈雨、戰火連天，霆鋒說：「香港電影好耐冇一部火力十足嘅戲，我哋連日嚟喺呢個場景開咗接近萬發子彈，每日開槍花費好幾十萬，加上我自細就追住丹爺嘅戲嚟學嘢，可以再合作，係好開心嘅事！」