羅霖封印水着寶貝仔「送嫁」

「美魔女」羅霖昨日舉行新書發布會，獲眾多好友撐場，包括米雪、謝雪心、梅小青、鄭明明、林建明、周家蔚、陳庭欣及陸詩韻等，場面熱鬧。身穿紅色「中門大開」晚裝的羅霖獲兩個囝囝翹住手出場，囝囝更錫她的臉，場面溫馨。

羅霖坦言沒想過兩子會上台：「尋晚佢哋突然話要上台，好彩佢哋冇怯場，同埋我本身唔係着呢件晚裝，但兩個仔話要着三件頭，因為有型，所以我就着呢件晚裝襯番。」她又表示有出嫁的感覺：「因為有好多朋友嚟支持，相信就算將來我再嫁，都冇咁熱鬧，因為想低調進行。」

留畀後生靚女

講到攝影師指她拍泳裝時很怕醜，羅霖坦言下次出書不會再影泳裝：「因為我睇自己都睇到夠，留番其他後生靚女嘅影，我出過兩次書，每次都係挑戰自己，如果下次再出書，我會搵另一突破，唔會再影泳裝。」又表示首批印了4,000本，將加印第二版，而收益會用作慈善用途，暫時捐了8萬給單親協會、心晴行動及仁美清叙。她還計劃與鄭明明合作推出自家品牌面膜，希望年底推出。

羅霖獲兩個寶貝仔送吻。	陳庭欣與周家蔚撐羅霖新書。	羅霖笑言下次出書會搞新意思。

周家蔚搵伴出寫真

陳庭欣及周家蔚同以白裙亮相，問到兩女可有意出寫真？周家蔚笑言：「我係咪遲咗少少？我記得10年前同朋友出咗本巴黎旅遊書，除非再有人同我一齊做呢件事，我就會有呢個勇氣，但自己一個唔敢。」至於一家人影又如何？她說：「睇佢哋肯唔肯，但我啲仔好鍾意擺Pose，哥哥鍾意擺功夫Pose，細佬就賣萌，其實我哋一年起碼影兩次全家福。（老爺洪金寶一齊影？）會o架，想影老爺揸住一張相，一代傳一代嘅感覺。」陳庭欣就笑言：「我可以出本鸚鵡寫真，七彩顏色好靚。」