「將個心交畀我」唐明救洛雯呻苦
《白色強人》後日就大結局，心臟腫瘤病發的洛雯（李佳芯飾）於今晚播出的一集替病人做手術期間再次病發，急召唐明（馬國明飾）幫手，唐明勸她接受治療，終憑一句「希望你將個心交畀我」勸服洛雯，並由他親自操刀做手術。
馬國明昨日受訪時指該場戲要在雨中勸佳芯不要放棄，坦言頗為辛苦：「導演要求一Shot落，唔想剪得太碎，但係我哋又要就番啲環境同人造雨，對白又好長，嗰場戲拍得幾辛苦，但效果出嚟都幾好！而Ali做手術嗰場戲，現場指導我哋拍攝嘅醫生話個手術係清除心臟癌細胞，喺醫學界係好前端嘅一樣嘢，難度相當高！我未拍呢套劇之前，完全唔知可以咁做，希望觀眾留意吓啦！戲入面除咗感情線外，手術室戲真係好好，劇本搵咗好多團隊同醫生睇過，所有手術喺合情合理嘅情況下進行，相當認真。」
