葉璇有卵無患結婚唔重要
久未在香港露面的藝人葉璇、溫碧霞與老公、岑潔儀一家三口等，前晚出席名媛趙曾學韞舉辦的「微笑擂台」慈善晚宴。提到與小默先生的感情狀況，葉璇甜笑說：「都係咁，呢幾年幾穩定。（有好消息未？）咩好消息？結婚？唔覺得結婚係好消息，有個相愛嘅人做伴，結唔結婚唔係好緊要。」她又說早有準備，不會為生兒育女而急着結婚：「好耐之前喺外國儲咗卵子，所以唔會擔心呢樣嘢，唔使為生小朋友而趕住結婚，享受二人世界先。」
講到有指她狀告小默先生的舊愛造謠，法院文件揭露她與小默先生已分手，葉璇澄清：「好多傳聞都係亂講，我唔想講嗰個人咁多，因為佢想宣傳。（傳聞有冇影響你同小默先生嘅感情？）唔會有負面影響，只有正面影響，令我哋更珍惜彼此，雙方價值觀好似。」而問到可會有機會在香港幕前演出，她說：「睇機會，我哋都醞釀緊一個純香港嘅劇本，希望盡快，我對香港感情都深。」
溫碧霞捐寫真拍賣
溫碧霞捐了80本寫真作慈善拍賣，問到老公可有先睹為快？她說：「今日新鮮出爐就送咗畀佢，佢有讚啲相好靚。（佢有冇幫手揀相？）冇呀，之前唔畀佢睇，想畀佢驚喜。（囝囝有冇睇過啲相？）有呀，佢都話好靚，其實佢哋有嚟塞班島探班，見到佢哋鍾意我都好開心。」問到老公可介意她性感？她笑言：「佢不嬲都覺得我好性感，佢接受到呢個尺度。」提到外界把她和羅霖兩位美魔女作比較，她則謂：「佢好似出美容書，唔一樣嘅，唔需要比較，每人有自己嘅美感，我從來都唔同人比較。」
