蔡瀚億老婆肚凸凸 掩嘴作嘔
早前憑劇集《荷里活有個大老千》成功入屋的藝人蔡瀚億（BabyJohn），與太太Donut結婚六年多，一直有共識生小朋友，但多年來努力造人，至今仍未有好消息，早前他出席活動時被追問造人大計進展如何，當時他說：「我都好想呀！惟有順其自然啦，有嘅會同大家講！」
食極唔飽 明顯發福
日前，BabyJohn與太太現身元朗區拍拖，先往街市購買大袋蔬菜後，再步入附近商場的食肆會合數名親友。Donut明顯發福，身形圓潤的她腳踏波鞋，又全程步伐緩慢拖實老公，即使穿上鬆身衫也難掩肚凸凸，孕味甚濃！
席上，Donut食極唔飽，老公已經停晒口，但她依然大啖大啖食，看來為佗B糟肥自己！埋單後，夫婦與親友道別，BabyJohn即化身人肉拐杖讓老婆翹到實，沿途步往取車時，Donut多次以手巾仔掩嘴，狀似孕吐，老公見狀更加小心翼翼扶着她入𨋢。
