Yanny打小人示威爭仔Heidi冇影
女子組合Super Girls成員Yanny榮升餐廳老闆，昨日新店開業大玩「打小人」，其音樂監製男友陳考威（Gareth）助陣撐場。曾與Gareth拍拖的隊友Heidi則未有現身，似避見舊愛與情敵。
首次開餐廳做生意的Yanny，獲一班圈中好友釗峰、陳健安、Cheronna男友黃奕晨到場支持，她表示為搞搞新意思，每逢周六都會請鵝頸橋的拜神婆來為客人打小人。昨日為慶祝新店開幕，Yanny與隊友Aka及Cheronna在餐廳門外邀拜神婆進行「打小人」儀式，打到「啪啪聲」，成功造勢。
夾六位數 學拉花幫手
講到投身飲食業，Yanny透露與幾位朋友合資約七位數字，自己是小股東只夾約六位數，自言多個學習機會：「其他拍檔個個都係師傅，我就係張白紙，所以負責宣傳。水吧係台灣師傅，識得奶茶拉花，所以都諗住學埋拉花幫吓手。」講到現場有打小人風俗，她笑言是餐廳其中一個特色，重金禮聘拜神婆每周「駐場」，Aka則指香港人壓力大，可以打小人發洩。
雖然是Yanny「好日子」，卻未見隊友Heidi出席，有指因男友Gareth而令姊妹反目。問到Heidi「冇影」是否怕尷尬？Yanny說：「唔係，Heidi同Jessica都唔喺香港，等佢哋返嚟會再約過。（Heidi係咪避你？）唔會……唔係啦！」提到男友的錄音室正正在餐廳對面？Yanny即解釋：「我都唔知，係拍檔搵咗舖話喺荔枝角，嚟到先知對面就係！我安咗10部Cam𥄫實佢！」