搵藍奕邦「自救」欣宜學放手
歌手鄭欣宜昨日到電台宣傳新歌《救命歌》，甫受訪即興奮大叫：「我終於出新歌！其實喺2017年12月就收到，但最近半年一路做嘢，喺音樂路上又碰到沙石。」自認控制狂、完美主義者的她，透過新歌學識放手、凡事都要學會彈性處理：「有好多嘢係冇得Plan，要放手先得到釋放，今次搵咗藍奕邦填詞，同佢係摸住酒杯底咁討論，最後帶出自己救自己嘅訊息。」
是次MV遠赴挪威拍攝，她笑言是「求救」成功：「呢半年開始會搵朋友傾訴、問意見，就有位圈中資深MV導演主動邀請我去挪威拍，以前拍嘢我會好緊張一定要睇Playback，但今次拍嘢我係冇睇過，尋晚收到MV嘅First Cut，我係喊到豬頭咁！」