「投訴」沈震軒爆肚 閻奕格喊打
音樂劇《搭錯車》的主要演員閻奕格及沈震軒昨日到新城電台宣傳，他們表示剛完成上半部分的6場公演，休息兩日後再戰下半場。騷前曾坦言驚趕不及換衫的閻奕格竟一語成讖：「真係出咗事！換衫嗰陣畀頭飾Kick住，扯住頭髮好痛上唔到台，真係諗過叫服裝師剪咗我啲頭髮，但佢唔肯，好彩最後佢好大力咁扯咗落嚟。」她笑言因為太入戲而差點轉Channel：「我一嬲就會講英文，有場嗌交戲太嬲，爭啲『What！』咗出嚟！」
沈震軒則怕醜笑指女友幾乎場場都捧場，又自認每場有爆肚演出，結果被閻奕格「投訴」︰「個底係一樣，只係想搵啲新鮮感，咁先好玩！」閻奕格說：「好想打佢！不過係好玩，但我啲廣東話反應唔快，驚佢有時爆咗啲我聽唔明嘅會呆咗喺度，我諗佢唔會咁整蠱我嘅！」