陳自瑤愛錫自己目標再大D
與視帝王浩信屢傳婚變的藝人陳自瑤（YoYo），冇人撐腰下惟有挺胸自強，以豐胸代言人身份大晒「媽咪級」好身材，由昔日B Cup變C Cup，望下一步變32D女神，不過其越級挑戰純屬自high，暗示跟老公無關。
現年37歲、育有7歲女兒的YoYo，自傳出與王浩信婚姻亮紅燈後，其事業心跟事業線明顯大躍進，昨日穿上低胸裝拋出「32C人妻」好身材現身活動，雙臂隨意一夾就營造出胸猛效果，她承認經過十多次療程後，成功由B升到C Cup，自信返晒嚟：「覺得每個女仔都想身形豐滿啲，同埋胸部線條靚啲，呢個係每個都想要嘅嘢。」她不介意自爆以往一味靠「托」製造假象：「工作需要托吓或者墊吓嘢，依家好多嘢都好Natural 。」
雖然上圍成功升一Cup，但YoYo未滿足，目標是D Cup，更得一想二，有豐胸又有健康胸：「現今女性胸部會有好多疾病，之前忽略咗，但經過今次療程後，領略到可以疏通淋巴同乳腺，第一次試做時，發現有淋巴塞嘅問題。」
兩夫妻冇干涉工作
問到王浩信對她豐胸成功有何評語？她說：「咁呢個係我份工嚟，冇去干涉大家工作，所以OK嘅。」她覺得身材好是自己受惠，不會在意別人目光。再問可會聽老公的意見？她大奏「潮州音樂」——自己顧自己：「做任何事都好，係愛自己錫自己去做，唔係因為其他人，又或者唔係要令一個人開心。」至於老公可有讚過？YoYo仍然冷冷地說：「OK啦！」