張智霖自資開巡演 勢吸千萬
「男神」張智霖（Chilam）在爭崩頭的狀況下突圍而出，成功取得明年4月紅館檔期，第三度舉行個唱，據知他深明人氣就是本錢，故今次嘗試「刀仔鋸大樹」自資做老闆開騷，再加長做長有的世界巡唱，勢勁賺千萬！
不論天王天后還是樂壇新人，目標都是踏上紅館舞台，Chilam亦不例外，分別於2011年及2014年在紅館舉行共五場演唱會，反應不俗。不少主辦商過去幾年都斟他開騷欲「黐金糠」，但Chilam自我要求高，加上要拍戲未能兩邊兼顧，即使去年底紅館有期給他都拒絕，令渴望在紅館開騷的歌手勁葡萄！
搵贊助易如反掌
當時Chilam表示待自己有期就會即刻入紙，果然「說到做到」，成功爭得明年4月紅館檔期，據知今次是他一手一腳入紙申請，更自任投資者。有消息指他預計投資幾十萬做個唱前期籌備工作，再找其他投資方承包個唱數百萬製作費。因他一向人氣勁、形象好，單是廣告代言由護膚品、健康食品、家居用品到財務投資，每年廣告酬勞已過千萬元，他開騷搵贊助，絕對冇難度！加上8月他與老闆蕭定一的經理人公司約滿，很大機會不續約，回復自由身專心籌備明年個唱！
內地走一圈好執
Chilam近年在內地亦很吃得開，電影、劇集，還有和太太袁詠儀夫妻檔拍攝真人騷，所以繼紅館個唱這個Project後，終極目標是向世界出發，過往他曾在上海、廣州、深圳、澳門及馬來西亞等地開騷亦場場爆滿，估計這個「如意算盤」將為他進帳千萬。據知Chilam首次自己搞個唱，事前有向一班紅館常客如郭富城、蔡一智等取經，為明年演唱會作出最佳準備。
