歐陽震華肉搏「群姐」要打格仔！
藝人歐陽震華（Bobby）昨日與一眾《愛．回家之開心速遞》演員到九龍灣宣傳，與劇中愛慕他的「群姐」許詩敏手牽手作狀啜嘴合照，相當搞笑！
Bobby客串的兩集將於本月24及25日播出，問到跟群姐有否親熱戲？他笑言唔少得：「係情侶嗰隻，佩服編劇組設計我哋呢Pair，睇出嚟唔核突！我哋成日情深款款對望嗒晒糖咁，當然唔係現實，係穿越時空，古代係祝枝山同花魁，仲有梁山伯同祝英台，民初就扮演《色，戒》入面梁朝偉同湯唯嘅角色，佢好似叫『湯碗』。（好似電影度露咁多？）《色，戒》幾多咪露幾多囉！到時大家睇吓有冇驚喜，聽聞要打格仔！（從影最大膽一次？）我哋好純真o架！」
至於劉丹表示前晚已收到父親節驚喜，獲孫女「小糯米」送蛋糕及心意卡；湯盈盈則指待老公錢嘉樂遊日返港後，與兩位女兒一同慶祝。