周家怡冰島追極光籲拯救地球！

平原內暗藏瀑布

冰島之行頭四日，天天落雨，每日都由頭濕到腳，天氣很難預測。去到Skaftafell Glacier冰川，烈風可以吹郁一個人，試過有旅客自駕遊，一落車連車門都吹甩，真是少點力量都好難企穩。

家怡表示：「到Reynisfjara Beach黑沙灘情況都一樣，亦係橫風橫雨，成日都冇乾身過，去到Seljalandsfoss時，感覺都幾特別，因為我哋明明去到一個平原，完全預計唔到會有瀑布，但行咗一段時間，終於見到，仲可以行入去個瀑布入面，當然成個過程要有一定體力，但係能夠見到咁多特色嘅美景，真係大開眼界！」

在冰島浸露天溫泉，是每位遊客的指定動作。	周家怡搞笑地坐在平原上「運功」。	冰島有不少教堂，周家怡更一踏彩虹之路。

龍蝦湯一試難忘

去到冰島，當然要追蹤北極光，但不是個個都能夠幸運地見到這種絕色美景，家怡自言今次非常好運：「我哋去到Akureyri時，終於見到北極光，真係好好彩，因為始終有光害。我哋揸車行咗十分鐘左右，去到一個較黑嘅地方，享受美景，呢個真係整個行程最重要嘅一環，個景靚到不能用筆墨來形容。」

雖然全身濕透，但能近距離欣賞瀑布值回票價。	如此震撼人心的絕色美景，可能隨着全球暖化而消失。	周家怡睇落嬌滴滴，但原來體力驚人，爬上冰川都冇問題。

除了美景，當然也有美食，家怡嘗到一個超級美味的龍蝦湯，令她一試難忘：「呢個龍蝦湯，真係全世界最好飲，佢唔係Creamy嗰啲，係稀稀哋嘅，但非常鮮甜！」

冰川暖化隨時消失

今次之行，家怡除睇美景外，亦有去參觀博物館，當中提及冰川受到氣候暖化的威脅，隨時會全部溶化，令不少人為之動容：「博物館由1800年開始，展示冰川每十年嘅轉變，近呢十年冰川溶得好快，一路睇落去，好多人都會睇到喊，成個大自然不斷咁保護緊我哋，但人類就不斷做一啲傷害大自然嘅嘢，破瓌地球，令到氣候暖化，再咁落去，冰川都好快會溶晒，唔少人睇完呢個展覽都會掛牌留言，大部分人都係寫拯救地球或者希望地球健康！呢個亦係好多人嘅心願。」