連詩雅最怕抽血諗起生仔喊驚
歌手連詩雅（Shiga）、森美、鄭俊弘及戴祖儀昨日出席捐血活動，Shiga自爆因為貧血不能捐血，同時最怕抽血及打針：「有次喺泰國做身體檢查，一抽血我又喊又嗌到好大聲，啲姑娘呆咗，連隔籬啲姑娘都衝入嚟睇發生咩事。（咁驚抽血，將來生仔要做體檢點算？）我都驚呀！不過到時至算，如果要生嘅話，至少會用一年時間調理身體先嘗試去生，好多朋友用唔同嘅方法調理身體，例如注重飲食、食補品，我都有取吓經，雖然未咁快生。」
森美出世 母流血不止
森美透露其母生他時流血不止要輸血：「咁我先可以安全出世，如果唔係都未必喺呢度，所以捐血好緊要。」又呼籲大家捐血助己助人：「每年農曆新年，蘇民峰都同大家講要捐血化血光，其實捐血對生活、健康都好。」他表示待子女16歲又夠90磅，就會帶他們去捐血：「等佢哋捐出第一滴血，作為父母都好想見證仔女嘅第一次，例如第一次踩單車、游水，捐血都係好好嘅親子活動。」
