張晉10樓高倒吊肉搏拳王

張晉在新片《九龍不敗》中有不少動作場面，最大賣點是跟外號「蜘蛛人」、十六連勝UFC（終極格鬥大賽）拳王Anderson Silva的多場激戰對打戲，有不少場口在澳門取景，為了拍攝尾段的終極一戰，劇組特別設計不少高難度動作，包括將兩人倒吊至十層樓高，半空肉搏！

打到痛先有感覺

畏高的張晉表示拍攝該場戲時有玩命的感覺，因是終極一戰，非常亢奮並不驚慌：「劇情講我跑過去，Silva踢我一腳，第一下佢驚整傷我有保留，到佢出真力時，我成個人被踢到飛起！到我打佢時，佢不停叫Hit me！Hit me！佢需要有痛嘅感覺先演到，所以呢場戲大家都打得好High，加上當時大家都冇着衫露出晒紋身，好有男人決鬥嘅感覺！」而首度由擂台打到上大銀幕的Silva，形容這場戲是自己最愛，覺得拍戲很新鮮：「以前大銀幕見到演員從貨車跳下，依家喺高塔跳落去，感覺好神奇。」

張晉、Anderson Silva除晒衫「隻揪」，拳拳到肉o架！

鄭嘉穎演「型」警啫，冇張晉咁辛苦。

鄭嘉穎慳力唔使打

飾演澳門司警的嘉穎則沒有動作場面：「導演唔使我打，如果要我打，我寧願同張晉打都唔想同Silva打，我怕佢唔識收力，我被KO！」

另外，張晉與老婆蔡少芬（Ada）、張母同上內地綜藝節目《我最愛的女人們》，在最新一集中，Ada「撒嬌」兼扮Sad指奶奶不停埋怨、罵她，最終奶奶「投降」柔聲細語：「哪裏是罵呀。」在旁的張晉笑言：「是埋怨！」之後一家三口開懷大笑。