王祖藍激似阿媽囡囡唔識分

李亞男去年底為王祖藍誕下女兒王天韻（Gabrielle），今年祖藍首次以爸爸身份過父親節。談到湊B趣事，他笑言樣貌與母親相似，經常令女兒「思覺失調」：「我哋企埋一齊時，囡囡會望吓我、又望吓嫲嫲，眼神會好疑惑，表情有啲迷惘。」

珍惜「低頭望」

約6個月大的Gabrielle愈大愈似媽咪，祖藍坦言非常感恩：「醫生幫佢做檢查，話佢嘅身高喺10個BB裏面，有9個矮過佢，所以我好珍惜望住佢成長嘅每一刻，因為我可以低頭望佢嘅時間唔多。我以為我嘅基因好強大，好彩個女完全繼承晒老婆嘅DNA。」

今年父親節對祖藍有多一重意義，令他更加掛念亡父：「其實我之前填咗首歌叫《活現》，好表達到我呢一刻對爸爸嘅感覺，『雖然在天邊，你的美麗在她身上活現，看不見你最美容顏，她卻活在你的溫柔裏面，熟悉的笑臉，活現在眼前。』每次見Gabrielle，我都會諗起爸爸，有啲傷感，亦有啲感動。」

李亞男減少工作，專心照顧家庭。

王祖藍作歌紀念父親。

體會亡父心情

祖藍直言爸爸離開後，每次過父親節都比較沉默：「睇住人慶祝，自己又唔知點慶祝，又掛住爸爸，我又唔會話好唔開心，但有種難以形容嘅沉默。依家多咗阿女，咁就多咗個意義去過父親節，同時亦更體會到爸爸以前就算幾咁外冷都好，其實佢內心對我哋都係好熾熱。」