出巡搶晒Fo劉小慧幫愛犬招親
「得閒修女」劉小慧日前偕老公蘇志威帶「囝囝」高加索犬Bear Bear到西貢散步享受家庭樂，愛犬出巡比兩位星級主人更吸睛，皆因牠身形龐大又長毛，站立時身高如成年男人般，甚為威武！「Bear Bear」在港屬較罕有犬種，雖被指比藏獒更有攻擊性，但實則相當乖巧，識聽小慧的「Sit」及「畀手」指令外，還懂得叼走主人口中的零食，全程未有亂吠。
小慧受訪時讚「Bear Bear」十分懂性：「知道幾時唔咬你，知幾時係Friend。」又分享一段「驚」歷，指有兩位裝修工人來家開工時，外傭突聞「救命」聲後趕出客廳查看：「原來Bear Bear用兩隻前腳踩住裝修工人嘅腳掌，仲發出『嗚嗚聲』，外傭即刻叫隻狗返出去，Bear Bear都好乖咁走咗。」小慧認為愛犬誤會有人偷竊才出「手」阻止，又透露欲為「囝囝」配種：「佢都成十歲喇！好想有好似Bear Bear嘅狗仔，所以想同佢招親，對方只要係高加索狗女，性格溫馴就得o架啦！」
