曹永廉心郁再出碟：唔怕死咪試吓！

藝人曹永廉前晚出席爐具新產品發布會，他已是第4年任代言人：「開心價，識咗品牌老闆7、8年，幾年前冇咁多嘢做嘅時候，佢已經搵我幫手，所以同佢唔係淨係講錢。」問到廚藝如何，他說：「我成日去街市買餸，以前自己煮，依家交畀姐姐（家傭），不過有時間嘅話，我都堅持自己去街市，事關我買嘢有優惠，姐姐買舊豬肉細細塊，我畀同樣價錢大好多！」