三喜臨門等做醫生夫人 馮盈盈啜爆何廣沛要男友㷫合合

馮盈盈獻出螢幕初吻，同何廣沛四唇交疊。

馮盈盈、何廣沛、唐詩詠及馬國明等昨日為無綫新劇《白色強人》宣傳，期間演員輪流量血壓，又向在場觀眾大派急救包，場面熱鬧。剛剝了兩隻智慧齒的盈盈面腫腫，問到此舉能否一併改善懶音？她笑指預告片被人捉到錯處，有意於首播夜開Live重讀100次改正。

新屋度過「初夜」

談到與何廣沛演情侶，還獻出螢幕初吻，她說：「呢套真係冇花冇假，四塊嘴唇疊埋一齊，拍嗰晚勁大風，何廣沛好貼心搽咗好多潤唇膏。（男友『寶寶』睇到點算？）會正面面對，首播一齊打住邊爐睇，(興)合合咁睇。」談到盈盈今日將踏入25歲，即將新居入伙的她笑指三喜臨門：「同寶寶嘅第一晚喺新屋度、我生日同埋套劇首播。（男友考醫生試考成點？）順利合格，感謝大家為佢集氣。（可以做醫生夫人？）咁要再集氣，要套劇40點收視先得。」何廣沛聞言即笑說：「我之前好辛苦先30點，你目標40點，其實你係咪唔想嫁呢？」

郭晉安出手量血壓，搞到唐詩詠喪笑。

馬國明讚唐詩詠好咀，仲嫌未夠激情。

馬國明「亂倫」咀詩詠

「哎吔兄妹」馬國明及詩詠首度合演夫妻，面對劇中親熱戲，二人同聲表示未有亂倫感覺，馬國明笑指原本希望更多親熱鏡頭，但遭監製反對，問到激情戲份如何交代？他說：「原本冇嘅，但我覺得應該係要激情少少。」詩詠則透露二人劇中感情戲很到肉，即使咀戲也感覺良好，問可擔心咀戲會被緋聞男友Samuel睇到？她說：「我都冇男友，關佢乜事。」二人早前頻頻被影到約會，如今卻火速落閘，莫非感情生變？