Sweet戲男友唔敢睇 高海寧隨時衝動嫁才子

無綫劇集《婚姻合伙人》快將大結局，兩位主角高Ling及楊明都直言感不捨，高Ling表示最近每晚都有追看，問到首次擔正給自己多少分？她說：「7分啦！可以好啲，但投入程度係超多嘅！」提到日前一場被黃德斌強姦後再跟老公楊明的鬧交戲，她直言拍足一日，整個星期都拍喊戲，眼腫絕不是靠化妝：「嗰排日日喊，情緒好低落，拍完即刻要去旅行。（有冇嚇親人？）試過半夜三點睇劇本睇到喊，阿媽擔心我唔開心。（男友有冇呵番？）演員要靠自己，但有呢個經歷係開心，好慶幸播出後好多回響，出街好多人都問我結局係點。」

喊得出色獲讚

問到男友鄧智偉對其演出有何評價，高Ling表示對方有稱讚她：「佢唔敢睇我啲夫妻Sweet戲，但就有睇我啲喊戲，佢都係容易被觸動嘅人，有讚做得幾好。」對於有指她與另一半有結婚共識，高Ling笑言每次拍拖都以結婚為目標，至於有否計劃？她表示未有打算，但不排除會一時衝動。

鄧智偉	高Ling在劇中喊戲連場。

楊明跟傳統過大禮

至於楊明指劇集話咁快就播晒：「我由開頭好似癲佬，到後面經歷好多男人最痛，總括嚟講好多觀眾鍾意，讚節奏夠快，出街多咗人對住我笑。（啲劇集清晒倉未？）呢兩個月播咗好多，得番《打工捱世界III》，下半年仲會見到我少少。」

提到女友莊思明日前出席何超盈的過大禮儀式，問是否前往取經？楊明說：「大家睇到（啲金器）都嘩一聲！我希望將來過大禮有一個角落仔就好，人哋係大家族，冇得比較。（有冇壓力？）冇，思明家人都冇畀壓力，好開通。（將來都做齊過大禮？）咁我都傳統，如果將來行到呢個階段，都預咗使啲錢，當然去唔到大家族咁啦！」

劇集多回響，楊明與高Ling當然高興。

莊思明（右二）日前與莊思敏及莊思華，見證何超盈的過大禮儀式。