張美妮頂唔順陣痛開刀生6磅女
39歲藝人張美妮去年造人成功，昨日於社交網宣布囡囡出世，她上載一家三口溫馨合照，並指囡囡乳名叫「笑咪咪」。見她與老公KK鼻貼鼻，囡囡則躺於母親臂彎內，畫面勁有愛。
乳名「笑咪咪」
已返家休息的美妮，昨日受訪時透露「笑咪咪」出世重6磅多，於原定開刀前一日搶閘出世，幸好她早已作好準備，未有打亂陣腳：「由於BB成日笑，所以我哋幫佢改咗個乳名『笑咪咪』。本來揀咗開刀日子，點知佢早咗一日作動，好彩一早準備晒啲嘢。入到醫院時，護士都問我諗住開刀定自己生，我話試吓順產先，想感受陣痛嘅感覺。不過當開到一度時，我已經頂唔順，最終都要開刀。」
老公幫得手
她又指女兒好乖好配合：「依家餵緊人奶，佢好聽話。老公都好叻，喺醫院時我負責餵奶，老公就幫手掃風同換片，姑娘都讚佢叻。」問到KK見到「前世情人」時是否很冧？她說：「係呀！佢同個女一樣，成日都笑咪咪囉。」