拉隊地獄式巴士巡唱 譚詠麟帶定紙底褲李幸倪濕身還債

阿倫與多位歌手包括李幸倪（Gin Lee）、麥家瑜、陳逸璇、趙浚承、周殷廷及符致逸等，在香港大球場場外舉行《音樂夏令型》巴士巡唱，各人在車上合唱，之後直駛往中環、銅鑼灣及尖沙咀巡演。昨日氣溫錄得32.6度，年年25歲的阿倫亦熱到大汗疊細汗，他笑說：「25歲實得，後生仔唔怕，不過底褲都濕埋，一次性嗰啲（紙底褲）都用咗一打，自己用或送畀人都有。（喺大球場外唱唔怕畀人投訴？）冇事，咁嘅音量。」

百萬製作碌爆卡

他透露新碟獲環球大手筆無限量支持：「一定係七位數以上，真係不惜工本，同埋6首歌都有串連，我嗰啲MV部分就拍晒，導演都碌咗十幾張人情卡，有啲好出名嘅藝人拍，不過我唔知係邊個。」阿倫稱去年剩下一些素人的好作品，不想浪費，故找來6位歌手合唱，各人資源分配公平，他讚公司製造融洽氣氛，好耐冇見過。

李幸倪（左）與麥家瑜保持心情平靜，務求唔濕身完場。

阿倫大汗疊細汗，預備一打底褲替換。

碼頭食風頭髮亂了

Gin Lee聞阿倫底褲濕透，笑言：「我哋盡量平靜心情。」與麥家瑜異口同聲表示是首次做巴士巡演，可覺得是「地獄式巡唱」？她說：「平時跟阿倫搵食，帶我哋食好嘢，要還少少債，出汗瘦番再食過。佢好照顧我哋，喺赤柱碼頭拍MV時，好大風，我哋啲頭髮吹到亂晒，佢淨係叫攝影師拍得女仔靚啲，自己唔靚唔緊要。」

Gin Lee表示與阿倫合唱的《千變萬化》，講述追夢和不如意的經歷，錄音期間對方希望唱出令人聽到喊的效果，最終她自己都唱到眼濕濕。