袁澧林越級挑機胡兆康失敗 我係坑王！

向來「仙氣」上身的袁澧林（Angela）今次完全沒保留，在人前展現活潑一面，應兩位「鐵粉」阿清與美斯邀請在保齡球場較量，原本自稱「高手」零難度的她，意想不到世界冠軍胡兆康突然踩場，即時被打亂陣腳，當堂怕醜兼O嘴變小粉絲。Angela見機不可失，不停叫對方使出真功夫，讓她從旁偷師，而胡兆康亦樂意向女神傳授必勝技巧。

讓賽照輸即詐型

在高人教路下，Angela打得有板有眼，不消一會竟膽敢向大師「下戰書」：「你教我嘅已經掌握晒，不如我挑你機啦，我哋打一局，香港冇人打得贏你，話唔定我就係打贏你嗰個。」見慣大場面的胡兆康點會被拋窒，欣然答應。為贏波Angela不惜提出讓Round賽，即胡每局只有一個機會，相反她就能補飛打兩球，認真唔公平。不過，胡兆康貴為世界冠軍，實力不容置疑，輕易打出「全中」，嚇得Angela球球碌落坑，被取笑是「坑王」，惟有全程以笑遮醜：「我只要贏到心目中嘅自己就得啦！」又詐型指對方沒有教她旋轉球。

球球落坑，失禮到坐地傻笑！	袁澧林向世界冠軍胡兆康下戰書，夠晒大口氣。	胡兆康捉實袁澧林手仔教用力，絕不欺場。

High爆叻番次

到決勝局，胡兆康為令比賽變得更緊湊，再讓Round只打中5支，可惜Angela繼續打落坑，大師亦忍不住加強力谷，最後一球Angela全神貫注，而兩位粉絲亦集氣替偶像打氣，但她一樣戴定頭盔：「唔落坑就當贏啦！」終於創造奇迹打出「全中」，她開心得興奮跳高，再坐落地下狂歡，雖然以19比25落敗，胡兆康仍大讚她有進步：「開頭有少少甩轆，但慢慢記番個力，打得OK嘅。」袁澧林食住上請求大師收為徒，他神回：「可以，得閒約出嚟玩。」

袁澧林	與粉絲約會的袁澧林見胡兆康踩場，驚喜萬分。	袁澧林今次識少少扮代表，教粉絲阿清及美斯打保齡。

經過一輪激戰後，Angela將之前絕學傳授兩位粉絲，正如她所形容是「BB班」，但與他們打友誼波明顯自在很多，玩得興起矇眼、用左手同背面開波，刺激欠奉，爆笑有餘。事後她開心與粉絲互動，並說：「全個過程都好難忘，我係扮緊保齡球高手同佢哋過招，點知畀佢哋發現我係坑王！」

場地：雷霆保齡