衛詩雅買800萬樓清袋冇錢裝修
藝人衛詩雅（Michelle）入行逾10年，前年表示先斬後奏瞞着父母置業買樓，以約800萬港元購入一個面積348方呎單位，並表示要給200餘萬首期。日前她到新屋驗樓，並帶備驗樓三寶包括伸縮棍、Memo紙和筆。
瘋狂接Job籌首期
過程中，Michelle先發現屋內牆身上的油漆太薄，隱約仍可見到裝修工人在牆上寫的字迹「280」，她即無厘頭搞笑地說：「咦！會唔會係神畀我嘅Signal？今期六合彩開咗未呀？」又發現浴室企缸門邊出現滲水情況，即激動大嗌：「漏水即係冇錢囉！漏走晒我啲錢呀！」又笑言收樓後需要更努力賺錢供樓。不過，她對其他細節都顯得滿意，最終自評驗樓結果為「A級」。
本報聯絡上Michelle，她表示其實當初有點失預算，原來要畀三成首期：「三個月內要畀240萬，我唔夠錢，即刻打畀經理人要求佢幫我瘋狂接Job，最終籌夠。咁大個女未試過銀行一蚊都拎唔到出嚟。（問父母借？）我好硬頸，今次冇問過人借錢，原來有目標就可以做得到。（要幾錢裝修？）其實都唔使，愈平愈好，只係買啲傢俬就可以入伙，咁啱經理人搬屋轉讓咗梳化畀我。（自住？）係！不過我唔會離開父母屋企，兩邊住。」