「欄」為單親媽媽！ 趙哲妤設保護區危機特訓
藝人趙哲妤（Uny）於2016年未婚懷孕，誕下女兒趙真羽（小魚），母兼父職照顧女兒花盡心思。小魚半歲識爬開始，Uny已在家中安裝圍欄，認為家居安全對小朋友來說最重要。
愛女心切的Uny，在家中用圍欄限制囡囡的活動空間，以免她橫衝直撞會受傷：「只要喺呢個圍欄裏面，唔好放好尖同會令佢受傷嘅嘢，咁就安全。圍欄下面都會放軟墊，無論佢哋點樣跌，就算痛都唔會受傷。」
最怕碌落床
Uny又在床邊安裝床欄，令小魚可以睡得安心，她說：「我整咗個床欄，可以校高校低，因為小朋友瞓覺時會左碌右碌，有個床欄就唔怕碌落床。揀床欄有兩種，一種就好似我哋呢啲木嘅，另一種就係網嘅，我覺得木欄可以訓練小朋友嘅小手肌，因為佢哋起身時可以捉住嚟爬起身，如果佢哋練習企都可以扶住嚟企起身。」
拆除保護角
除了圍欄及床欄外，Uny亦曾安裝保護角，但由於小魚逐漸長大已逐步拆除，訓練她提高危機意識，Uny說：「小魚已經兩歲，可以畀佢知道咩叫危險，所以就拆咗啲保護角，當然我每次都會提點佢唔好整親，如果整親會痛痛o架！ 」
