預習老婆「卸貨」路線 莫家淦停工煮飯湊仔
藝人莫家淦太太正佗第二胎，預產期在6月初，由於太太已腹大便便，早前他已向公司申請暫時不開劇，以便陪太太生B，家住深井的他們更曾「預演」由屋企去醫院的路線圖，以便到時送老婆入院。
日前，莫家淦與妻兒到荃灣開餐，其後腹大便便的太太先行離開，他即做「帶子洪郎」帶囝囝去揀玩具及去冒險樂園玩，之後再買餸回家煮飯，囝囝全程開心雀躍，在商場的親子活動區跟其他小朋友打成一片，跑來跑去，辛苦了莫家淦尾隨照顧。
代細佬買玩具
其後莫家淦受訪，表示除了「走佬袋」，連入院路線都一早預演過，確保萬無一失。而提到買禮物給囝囝一事，他說：「佢就嚟4歲，我哋生多個都係想陪佢，但又怕佢呷醋，所以同囝囝講，細佬出世佢都有好處，仲代細佬送禮物畀佢，買咗嘅玩具要等細佬出世先可以拆嚟玩。」
講到見到大仔比較黐媽咪，不時扭媽咪抱？他說：「因為我成日出咗去做嘢，佢同媽咪相處時間多啲。依家老婆個肚都大，唔抱得佢，所以我哋都有解釋佢知，佢都好明白，冇扭計。」