郭富城心痛老婆停追慈姑椗

天王郭富城（城城）、楊千嬅、葉德嫻、汪明荃及丁子高等昨日出席環保活動，響應香港首個「無膠日」。剛誕下細女「二寶」的城城風騷受訪，難掩喜悅說：「二寶喺4月出世，中文名仲研究緊，英文名叫Charlotte，因為想同大女（Chantelle）一樣用『Ch』開頭。」對於太太方媛（Moka）出Post爆大女呷醋，城城笑住承認：「有少少啦！我抱住BB佢就有少少呷醋，依家仲係新手慢慢學習緊，會氹吓佢，遲啲希望一家大細去公園玩。」

陪產戥方媛辛苦

講到Moka得天獨厚極速收身成功，城城先冧笑話「OK」，然後心痛說：「佢好辛苦！（點樣獎勵佢？）錫佢多啲！自從今次二寶出世，發覺媽媽真係好偉大，佢兩次都係順產，過程都好辛苦，兩次都有入產房陪佢，仲有幫手剪臍帶，睇住兩個女出世，覺得好開心、好幸福、好感動！」至於會否追個仔？他肯定地說：「暫時唔會住，呢個世代嘅思想，仔女都真係冇所謂，最緊要係健康，我唔知有囝囝係咩感受，但依家好滿足！睇到太太喺分娩過程好辛苦，想佢休息吓先！」

城城、汪明荃、葉德嫻及楊千嬅分享環保心得。

丁子高向來有教囝囝支持環保。

自由戀愛拒對親家

千嬅大爆城城有分享細女照片：「好得意！兩個女都眼大大、好靚、好似樣。（似爸爸定媽媽？）兩個都似。（流晒口水？）冇，呢啲緣分嚟！早知係咁，當年就盡快追，唔好隔咁耐，依家隔太耐，個仔都7歲。（對親家？）呢啲冇得管，教佢哋自己選擇、擴闊社交圈子。」

此外，席間不少藝人分享環保心得，葉德嫻呼籲減少着波鞋，因鞋底含塑膠成分。隨後穿波鞋的千嬅上台時險仆親，即被主持林盛斌揶揄：「都叫咗你唔好着波鞋！」場面爆笑，她受訪時笑說：「係佢（林盛斌）第一個畀人話先。」續指囝囝Torres的環保意識甚強：「我一拎錯嘢佢就會大嗌『媽咪』，我直頭覺得自己犯咗法咁！其實有用環保袋、自備餐具同水樽。」