曹永廉黃祥興見證場面感動眼濕濕

藝人曹永廉、黃祥興出席蕭正楠及黃翠如於峇里舉行的婚宴，阿廉受訪時說：「其實我睇住佢哋識嘅！睇住佢哋一步一步行到依家，呢單Case我由《師奶MADAM》跟到依家，見到佢哋咁真係好開心，佢哋大家錫大家都錫到燶咁，真係好難得，現場見到雙方家長，我都感覺好似自己細佬結婚咁，今次去到就真係歎吓世界，同佢哋啲家人出去食吓嘢，夜晚大家喺池邊傾吓偈，都好開心。」而祥興則說：「翠如靚到不得了！阿蕭又靚到不得了！現場環境又靚，下晝行儀式，夜晚大家就一齊食飯，我哋都有諗啲遊戲同大家玩，我哋、新人同佢哋父母都有講感受，講到大家眼濕濕，場面好感動。」