劉溫馨破4年Dry缽 金融財俊入手！
藝人劉溫馨、周柏豪與吳若希等前晚現身無綫慈善節目《公益金萬眾同心50年》，早前到印尼出席朋友婚禮的劉溫馨，自爆此行雖未能搶到花球，但單身四年的她卻透露有追求者：「佢做金融業，係教會朋友。（依家感情穩定？）開心囉！佢比較怕醜，所以冇刻意講。（男友有冇陪你去印尼？）有嘅！（取經閃婚？）唔會！屋企人好傳統。（見過你屋企人？）冇，佢屋企人我之前已經認識。（過晒試用期？）未到結婚都未知，總之依家都滿意、開心階段囉！」
吳若希爆胡鴻鈞抖一個月
柏豪聯同吳若希、連詩雅（Shiga）於節目內甩麻雀，他笑指Shiga是遊戲高手，加上語出驚人，一出現自然令節目收視上升：「佢會用好肯定嘅語氣去表達錯嘅嘢，好好笑！我話成個娛樂圈，呢類人佢排第五，但前四位未搵到，佢又接受喎！好可愛。」吳若希對於老友胡鴻鈞拍劇受傷入院，表示有到醫院探望：「佢係清醒嘅，跌親後尾枕。（認唔認得你？）佢知我係邊個！等佢過幾日檢查完再去探佢，好似要休息一個月，下個月就會同我去美國做騷。（到時未好番你頂晒？ ）佢一定好得番，好少答應我嘅嘢會甩底。」
至於緋聞男女郭子豪與鄧卓殷分別於節目表演，但齊齊失準，子豪做引體上升籌款卻有點「揸流攤」。
