張敬軒糯米雞「漏餡」 跪到爆褲收檔！

一連兩場《HinSideOut 2019張敬軒演唱會》前晚假澳門威尼斯人金光綜藝館舉行尾場演出，他以似足火雞的造型揭開序幕，一心入場聽靚聲好歌的Fans，卻被其腰間透視的贅肉吸引眼球，軒仔笑說：「唔可以鞠躬太多次，因為頂住個2、3公斤嘅雞冠頭同埋肚腩！」全場爆笑。大會配合其英文名「Hins」設計了兩邊相距30米的「H」形舞台，軒仔打趣說：「雖然我上咗年紀，但今晚會竭盡所能，當新居入伙拜四角！」

他笑言頭排歌迷完騷後可能會患上肩周炎，故特意上前與他們握手。他之後全情投入唱《靈魂相認》時，一起身就慘叫爆褲：「我諗我真係肥咗，跪爛咗條褲！」但慶幸只是左膝位置爆開，沒有走光：「呢套衫啲Fans話似恐龍、糉葉，依家我就好似一隻糯米雞咁！」

完騷狂掟「火龍果」

軒仔為首次澳門場個唱「加料」，獻唱新歌及加穿兩套新衫外，安歌時還首次以螢光套裝襯粉紫色爆炸頭的「火龍果」身份登場，大跳扭腰趷籮舞，演唱惡搞好友容祖兒新歌《Pretty Crazy》的《Pretty Hungry》，完騷時更出力將200個假「火龍果」拋落台，又嘲笑真身：「係咪靈活過嗰個『老嘢』張敬軒呢？」有Fans召喚軒仔另一分身「降兩度」出場，High爆的「火龍果」說：「嗌大聲啲可以歡送佢！尋晚有Fans問我Pat Pat係咪真，珍珠都冇咁真呀！要唔要搵個人上嚟摸吓？今晚冇帶祖兒姐嗰個假髮，求其拎住佢（降兩度）個『大波頭』嚟戴住先！」觀眾讚他靚時，他妙語連珠：「靚係太片面，索都太渣，我呢啲叫高雅，特別係呢個『大波頭』好似蔡琴！」隨後卻突然宣布：「今晚係我告別樂壇之作。」

跪到爆褲，軒仔即時嚇到定格。	「火龍果」壓軸登場，狂掟「紀念品」。	咦？條頸有「咖喱雞」嘅？

右頸驚現「咖喱雞」？

騷後受訪時，問到「火龍果」閃電收山，軒仔表示是「火龍果」的決定：「佢話受盡樂壇前輩嘅白眼，例如張敬軒。」轉頭卻表示願意為容祖兒的紅館騷復出，因為她最錫「火龍果」：「佢發夢都叫住祖兒，依家喺條街啲人叫我『火龍果』多過張敬軒，睇吓佢有咩搞啦！」問到右頸有紅印，疑是「咖喱雞」？他即澄清只是敏感：「唔通喺後台……進補咩？」台上自認「糯米雞」的他自爆排舞後狂食致肥，又指上次因哮喘病發而取消演出，今次連開兩場騷可說是一雪前恥！

【特派記者梁楚君澳門報道】