「翻版朝偉」追氣質女神 吳肇軒認戀師妹
25歲新進演員吳肇軒，2015年憑電影《哪一天我們會飛》備受注目，加上外貌與氣質被指似梁朝偉，故有「翻版梁朝偉」的稱號。去年2月，他受訪時表示單身和享受無拘無束的生活，但原來已秘撻同門師妹、有「氣質女神」之稱的張蔓莎。由於二人正為事業搏殺，故低調處理感情。
好友放相洩蜜
據知，張蔓莎姊姊張蔓姿與吳肇軒均是演藝學院同學，二人在張蔓姿穿針引線下認識，及後合作ViuTV劇集《身後事務所》，日久生情下撻着。二人除了工作的合照外，甚少將拍拖生活照上載社交網，反而身邊好友不時公開聚會相片，每次見他們都「糖黐豆」般形影不離，令戀情曝光。
經理人冇阻止
吳肇軒昨日受訪時直認與張蔓莎拍拖：「其實拍咗一年半左右，我同佢合作劇集。（好友洩蜜？）只係我哋兩個唔興喺社交網高調啫！其實一直都有人講，都有朋友知嘅。（視張蔓莎為結婚對象？）冇諗咁遠，我25歲咋，你問我第時會唔會結婚，我都未諗啦！我哋依家呢個關係好融洽。（出街拖手？）咁我哋都好貼地嘅，有試過撞到朋友，都冇所謂。公司經理人都知，冇阻止，唔會話刻意唔同女友合作。」
