處女擔正激瘦10磅 高海寧遭導演嫌棄迷惘中開竅
正在熱播的《婚姻合伙人》中，高海寧首次擔正，大嘆女主角唔易做！因壓力太大而足足瘦逾10磅。以往拍咀戲都會面紅兼頻頻NG的她，今次與楊明、黃德斌分別有咀戲，坦言迷惘中獲導演點醒，突然開竅全情投入，加上「瞓身」演出，難怪高Ling一劇接一劇。
入行11年的高海寧（高Ling），前年接拍無綫劇集《婚姻合伙人》首次獲安排做女主角，拍攝時固然緊張，就算現時播出，她依然相當上心，更於每集完結後上網「獻真身」，與網民討論劇情與演技，令人大為驚喜。其實，高Ling今次於《婚》劇的演出亦相當有驚喜，皆因她早已收起性感，就連無綫大型活動亦刻意玩密實，期望觀眾留意其演技與實力，但今次為「女一」再次犧牲，劇中有多場裸背或穿泳衣的鏡頭。
放手去演 投入「上晒身」
雖然身材依然受注目，但高Ling的演出亦得到不少好評，她受訪時亦說：「演出初期都感到迷惘，『女一』認真唔易做，好想做好但唔知點做好！原來做女主角好忙，唔夠時間用，一早拍外景、緊接夜晚開廠拍到凌晨，返屋企瞓兩個鐘又開工，有時連食飯時間都冇，更加冇時間畀自己思考點做。」令她明白女主角為何會變得纖瘦，因沒有時間休息，當時即使晚晚食消夜，她拍攝期間仍足足瘦了十多磅。
慶幸高Ling很快放開自己，走出短暫的迷惘期，她說：「做『女一』有壓力，成日諗點樣做得好，諗太多反而好冇安全感，亦都冇信心，連導演都同我哋講，覺得我同楊明唔夠默契！我哋當時又唔係咁熟，但係諗唔可以再係咁迷惘落去，叫自己放開啲，直情當楊明係戲裏面嘅角色。」明白放手去演後，她坦言突然有開竅感覺，能夠全情投入角色：「入咗戲之後，自己除咗瞓覺嗰陣係高Ling之外，其他時間好似變咗『貝競枝』！第一次有咁入戲感覺，未入戲之前都要諗點去記對白、點畀反應，但入咗戲所有嘢都好似『上身』咁，對白又容易記，同楊明更加會有啲互動『爆肚』。」
勁多咀戲 改善面紅毛病
劇中除了與楊明有感情線外，高Ling還跟黃德斌有段曖昧之情，更有不少咀戲，她說：「之前拍《不懂撒嬌的女人》嗰陣都有同林文龍拍咀戲，因為我一咀就面紅，所以拍咗十次先得，但今次咀戲仲多，初頭都好尷尬，都係一錫就面紅，慢慢先有改進。」如今順利踏出第一步，相信高Ling的演技定能更上一層樓！