姚子羚拍陳山聰「跑」出新天地
藝人姚子羚之前被捲入四角關係，幸運地事件沒有影響工作，稍後更升呢女一與陳山聰合拍以跑步為題材的新劇。昨日她返無綫開工，表示希望事件盡快完結，之後會休息調理身體。而山聰則笑言要盡快搵番雙腳做好準備。
陳山聰、姚子羚是工作上的好拍檔，同樣熱愛跑步，是Crazy Runner成員，對於無綫8月開拍以跑步為主題的新劇，可說為二人度身訂造，其他參演的藝人有馬拉松跑友胡諾言、蔣志光及劉穎鏇等。子羚接受本報專訪時說：「今年不停咁拍冇抖過，太多動作戲，都想拍完《唐人街》休息一下，調理吓身體。」她指現時周身傷，之後要去睇跌打：「之前畀展鵬踩親隻腳，瘀咗個幾星期，佢都好唔好意思，每隔兩日就打電話問候我，到依家佢仲欠我一餐飯。」
「先搵番對腳」
圈中最跑得的「跑男」陳山聰受訪時坦言非常開心：「今次真正開正我嗰瓣，咁好嘅題材，除咗講跑步仲包含溫情同愛情。」據知，他與子羚將再演一對，劇中他是跑步教練，有一名女兒。問到拍完《唐人街》後只得兩個月時間，最急切要準備甚麼？他說：「要搵番我對腳出嚟先！之前一直要開工跑少咗好多，依家仲要顧住排『朱古力』，所以要操番跑步先。不過夏天跑步係辛苦嘅，會搵啲專業跑手嚟一齊操、一齊練習，喺佢哋身上可以搵番角色上嘅形態同感覺。」
說到子羚捲入四角關係，山聰對她甚有信心，不擔心事件會影響其工作情緒：「佢係好堅強嘅人，工作亦好專業，我絕對唔擔心佢。」
想事件快完結
此外，子羚昨日返電視城繼續拍攝《唐》劇，對於有報道指她擔心有情慾片曝光，她肯定表示沒有拍過：「要交代嘅都講晒，某程度上嗰啲係我嘅私隱，我啲相畀人公開，我都係受害者！（會唔會報警？）要同公司商量，現階段希望件事盡快完結。」對於有指她威脅Raymond，要他在前妻與她之間作出選擇，她不作評論。