盧巧音鬧交增進感情：呃呃氹氹就一世！
盧巧音即將舉行演唱會慶祝入行20周年，問到屆時老公Sammy可會唱埋一份？她表示老公Sammy所屬樂隊Kolor屆時都要開騷，所以今次不會幫手。問到兩夫妻相愛10年，有何愛情保鮮法？她坦言：「有啲咩拎出嚟講，唔好擺喺心，鬧交一定有，有時鬧交先知對方原來係咁諗，我就知點檢討。（多唔多鬧交？）都多o架，因為我哋性格都比較火爆，雖然恩愛，但都會鬧交，都係增進感情嘅其中一個方法。」問到吵架時會否雙方都不讓步？她說：「如果兩個都知自己硬朗而唔讓嘅話，就好快會離婚，咁梗係是但一方讓。（通常邊個？）每次都唔同，知道唔啱就會講對唔住，最緊要知道兩個係建立緊關係，唔係摧毁啲嘢。」
互不相讓好易離婚
她坦言夫妻間常因小事發生摩擦，問到結婚愈久，吵架次數會否減少？她坦言：「都未必o架！因為某程度上我當佢係朋友，同朋友好多嘢可以傾，如果有『先生太太』嘅名銜喺度，有啲嘢就會唔想講！如果嗰個係一個問題，久而久之就會變咗大問題，所以盡量咩都傾吓、講吓、笑吓就最好，我哋相處係咁，呃呃氹氹就一世！」
最盡淨戴Bra上台
她的20周年演唱會《盧巧音SENSE．感演唱會2019》將於本月24至25日在旺角麥花臣場館舉行，問到屆時可會分享入行20年的深情說話？她說：「深情說話我冇乜，我唔想人哋見到我崩潰，想大家見到我完完整整咁做好一個演唱會，而且或多或少歌曲都代表到歌手嘅心情。」歌衫方面，問到可接受性感？她說：「我戴個Bra喺台上都係咁啦，最盡o架啦！我覺得係件衫、成個舞台、成個畫面出嚟性唔性感。」
場地：九龍香格里拉大酒店香宮中菜廳