李尚正貞子遊花海代出頭講數
由李尚正、盧頌恩（妹頭）主持香港開電視節目《臥底旅行團2.0》將於5月19日播出，承接上一輯的求真精神，兩位主持深入了解「一蚊兩天團」、「送禮一天團」，如何「驚喜」處處！李尚正更化身「正女郎」參加賞花團，又搭上「亡命光速車」返回羅湖，全方位揭露內地團的千奇百趣！
香港開電視節目《臥底旅行團》去年推出，大獲好評，新一輯即將播出，李尚正坦言今輯的臥底任務比上一輯更有難度：「因為上一輯《臥底》都多人睇，所以變咗件事好多時黃咗，難度分加零點五，要叫同團嘅團友啲表情動作、造手自然啲先搞得掂！」
扮女人襯靚景
談到今次其中一個「任務」是扮女人，李尚正大呼過癮，笑言同個花海靚景襯到絕：「今輯男扮女裝真係最好玩，可以喺個花海拋開自己嘅性別，喺美景襯托下擺番個靚靚長腿甫士。不過，化妝花成粒幾鐘，所以不嬲都話天生麗質幾緊要，依家化咗啲人都覺得係貞子出巡！」
面皮薄心虛
「送禮一天團」、「一蚊兩天團」通常都會帶團友去多個地點購物，不少紛爭亦由此起，節目內，團友遇上貨不對辦，李尚正「勇」字在心口，決定返回購買地想退貨，可惜最終失敗而回：「面皮唔夠厚撐唔行，對方仲叫埋個大粒嘅出嚟，話只可以換，始終人哋地方，世面又見得少，同埋對家好似已經喺百度起咗我哋底，個心虛咗，最後只好接受換貨。」
生死時速亡命浸溫泉
李尚正與盧頌恩為攞料捐窿捐罅，更一度搵命博，參加三天莽山森林溫泉團，來回車程需要十六小時，回程時，司機為趕及羅湖口岸關閘前到達，化身亡命司機，大玩「生死時速」，嚇到李尚正在路上要默默祈禱：「知道來回車程要16小時，其實都已經有啲擔心，始終司機叔叔都係人、會攰，尤其最後回程要趕喺羅湖口岸收工前到達，當時仲要天雨路滑，車速用個快字嚟形容都已經好畀面！暗地裏都不斷有為攝製隊以至成村人嘅安全祈禱，全程都唔敢瞓。」
