班尼狄七度提名開齋封視帝

BAFTA旗下兩大影視頒獎禮是當地盛事，每年年初舉行的電影頒獎禮被封「英國奧斯卡」，班尼狄甘巴貝治（Benedict Cumberbatch）曾憑《解碼遊戲》（Imitation Game）爭影帝，最終失落而回，而他於電視頒獎禮亦已第7度獲提名，前日終於憑去年由他監製兼主演的人氣迷你劇《Patrick Melrose》封視帝！

為角色變得古怪

他於劇中飾演小時被父親性侵與虐待、導致成長後酗酒吸毒的花花公子，後來為家庭決心改過，演技大獲好評。陪跑多年終獲獎的班尼狄，一上台就興奮多謝大會，同時表揚監製同劇的好友Rachel以及Adam Ackland，出名為愛妻號的他更不忘放閃：「呢個世界仲有個人我要多謝，我要多謝我太太Sophie，你係我嘅磐石，我為咗（呢個角色）要變得好怪，有啲嘢我要去做，而（你令我）返到屋企重新感覺到好平安、平穩，真係好好！」認真Sweet！至於二人入場時亦於紅地氈情深咀嘴晒恩愛，肉緊到爆！

Jodie Comer奪視后

其實班尼狄早於2005年就憑電視電影《Hawking》演霍金（Stephen Hawking）獲提名視帝，之後多年分別憑《新福爾摩斯》（Sherlock）及《The Hollow Crown》等再爭獎，但次次都食白果，等足14年終於獲獎，粉絲瘋狂轉載消息派Like！

此外，前日的頒獎禮由人氣劇集《嗜血嬌娃》（Killing Eve）成為大贏家，獲得劇情組最佳劇集外，女星Jodie Comer封視后，而Fiona Shaw就獲最佳女配角獎，劇集更連掃兩個技術獎，認真巴閉！