林欣彤剪髮過檔做許廷鏗師妹
「小巨肺」林欣彤（Mag）成為好友許廷鏗的師妹，昨日唱片公司宣布她正式加盟華納唱片，正錄新歌及飛抵日本拍「頭炮」歌曲MV。日前她在Ig上載剪短及電鬈頭髮的相片，留言：「新人事、新作風、新髮型」其新動向早有迹可尋！
Mag昨日接受長途電話訪問時表示，與華納簽下經理人及唱片合約，問到是否許廷鏗拉攏？她說：「某程度上關佢事，見到佢喺華納發展得好好，我有呢個信心，第一首歌就可以去日本拍MV，好珍惜、開心同興奮。佢哋好照顧我，有被寵嘅感覺，我轉咗髮型想畀人成熟少少嘅感覺。」月底新歌即將面世。
去年底她因聲帶問題無奈取消12月舉行的處女個唱，現時最大心願是再開騷，為了有健康的體魄，已積極做運動操Fit。