兩歲都未夠！孫慧雪爆囝囝有女友
歌手吳若希與孫慧雪昨午到紅磡出席活動，問到如何慶祝母親節？吳若希說：「囡囡送咗個吻畀我，同長輩一齊食完飯，老公送老爺奶奶返澳門，點知囡囡喊住搵爸爸，係第一次，搞到老公好自豪，我咪畀佢威一次囉！」
至於孫慧雪指囝囝已經21個月大，口齒伶俐，可以用完整句子溝通，談到求學問題，她笑說：「佢返緊學前班，但人細鬼大，已經有女朋友仔嘞！佢依家有成30磅，之前同佢去日本旅行，我孭住佢覺得好辛苦。尋日有兩個朋友結婚，帶住佢忙足一日，佢喺婚禮上執咗啲花送畀我，又畫咗個手袋，叫我攞去買餸。」
