英國殿堂級女子組合辣妹本月底舉行的回歸騷成為焦點，雖然拒絕「歸隊」的「碧咸嫂」Victoria曾多次公開表示會撐場，但近日竟被傳「人前人後兩個樣」，不但未有打算現身，更禁止4名子女去睇辣妹騷，而她更被爆冇去仍有望憑騷吸金3,100萬港元！
Victoria月前公開表示因為時裝事業而未打算與辣妹（Spice Girls）舊隊友合體開騷，當時更多次傳出與Mel B不和，但她後來亦不時公開表示會力撐眾女，還稱自己一定會親身撐場，又說過：「呢個一定會係最正嘅騷，我都等唔切帶埋仔女去睇！」
不過，近日有知情人士爆出辣妹成員Geri Horner出面力邀Victoria與碧咸（David Beckham）的4個子女及女方父母Jackie及Tony睇回歸騷時，她竟然不為所動！爆料者又指：「雖然Geri話出錢請Victoria一家睇騷，但實情係Victoria唔想佢哋去或者被影到現身個騷，免得佢被寫成冷待前隊友，佢想同辣妹劃清界線，雖然愛佢哋，但辣妹時代已成過去，佢只想繼續前進。」至於Victoria的發言人亦表示她於辣妹開騷期間身在海外工作，同時未有回應其子女會否出席。辣妹回歸騷將於本月24日在都柏林展開，下月於倫敦舉行尾場。
雖然Victoria冇份上台甚至未必到場，但早前有傳她仍能憑回歸騷的辣妹紀念品大賺一筆，印有其肖像的紀念品預計為她帶來300萬英鎊（約3,100萬港元）收入，完全零付出都有得分！
另一方面，辣妹餘下4女近日為演出緊密綵排，雖然Emma Bunton表示眾女未因Mel B於訪問中自爆早年曾與Geri上床而影響感情，但她於社交網分享的影片中就未見Mel B與Geri互動。而她們接拍廣告時，Mel B更疑被冷落，冇份抱抱晒姊妹情！