楊千嬅被囝囝「換血」晚晚失蹤
「熱血天后」楊千嬅趁假日拉埋囝囝Torres參加慈善步行籌款活動，親子互動作身教行善！她自嘲被囝囝成功「換血」，養成早睡早起習慣，一到夜晚就玩失蹤。
身為活動慈善大使的千嬅昨晨以一身全黑運動裝束現身山頂參與活動，她大笑自誇好熱血：「好耐都冇參加，有帶埋阿仔嚟一齊行，畀佢試吓落雨嘅感受，但依家太大風佢匿埋咗，喺佢3、4歲就已經同佢行山當親子活動，相信佢都會Handle到。（佢起到身？）起到，每朝7點半就拍醒我，依家我好似換埋血咁，夜晚十點幾就瞓，失咗蹤咁。」正舉行巡迴演唱會的她透露，下星期會去紹興舉行第3站，之後到7月就會放假一個月陪Torres去旅行：「地點未Plan，希望去啲玩體能嘅地方，跟住8月就會繼續巡演至出年。」
另一活動大使黎諾懿孖太太李潔瑩出席，講到由他主持的綜藝節目《懿想得到》受許志安偷食黃心穎事件牽連，需重拍黃心穎參與的馬來西亞外景部分，繼早前宣布由楊明頂上後，黎諾懿透露今早會與對方起程「重遊舊地」，不過行程就會縮短為5日4夜：「今次搵男仔係因為想喺短時間內完成，楊明係由拍《十兄弟》開始識咗16年，一叫佢嚟幫手就即刻嚟，佢尋日先喺哥倫比亞拍完《打工捱世界3》飛返香港。」楊明無懼時差問題捱義氣接拍，認真唔話得！
洪天明兒子高燒逾40度
黎諾懿又表示今次重拍有幸再獲馬來西亞旅遊局支持：「佢哋好幫手Sponsor一半以上，公司可能出少少錢。抽起心穎部分都可惜，節目係用我個名，但顧及大家同馬來西亞嘅感受，如果大家接受到重拍，呢個都係一個好嘅解決方案。」問到心穎有否私下致歉？他坦言沒有：「冇聯絡，大家都係大人都會明白，畀啲空間佢沉澱同休息。（依家搞着你。）OK嘅，大家明白，同埋佢之前都有講過Sorry，一句對唔住依家都唔重要。」
至於單獨現身的洪天明，大爆細仔JT發高燒至40多度，太太周家蔚留在家中照顧，他心痛地說：「睇咗醫生有食退燒藥。我前日返嚟、今日就要走，一走就去到7月初，都會心掛掛！佢（JT）今年生日係我第一次冇同佢過，返嚟都有補祝食飯，小朋友最緊要都係禮物！」