田蕊妮拍MV念亡母催淚

「視后」田蕊妮日前拍攝送給天上媽媽的新歌《最親》MV，碌人情卡請「影后」鮑起靜飾演其母。雙后在MV中對手戲不算多，但尾段阿田挨在鮑起靜的膊頭享受母女溫馨一刻時，鮑起靜面露不捨之情跟阿田說：「女呀！我已經準備好啦。」阿田表情瞬間由喜變悲，眼紅紅的望住鮑起靜說：「但我仲未準備好喎。」這段對話，原來是田母在醫院病重時對她說的，阿田說：「個鏡頭拍咗八次，但唔關我情緒事，係因為燈光、角度問題，當時我諗起媽媽，喊咗好多次。」

珍惜與至親相處

田母患癌過身兩年多，阿田堅決表示不會放低媽咪，永遠與她一起：「我有佢嘅基因，今次拍呢段對話，係想分享畀大家知，唔好嫌媽媽長氣、好煩，媽媽永遠當個女係細路女，要珍惜同至親一齊嘅時間。好彩喺佢離開前我捉緊機會去明白、了解佢，佢離開之後我急速成長、成熟。」

一言驚醒唔化濃妝

阿田和鮑起靜在亞視合作多年，因MV需要媽咪角色，就膽粗粗邀請對方：「好多謝佢一口答應，即時同我度期，請鮑姐唔可以用錢衡量，所以我送咗件披肩畀佢。」她最難忘是初入亞視時，鮑起靜指她化妝太濃個「樣」出事：「佢同我講：『拍電視要入屋，啲妝清清哋最靚。』」於是阿田放棄了模仿濱崎步的誇張化妝：「諗番都好嘔，廿幾年嚟，我拍劇都化淡妝，除非劇情需要。」

此外，昨日她到電台受訪，又講到並非不敢做媽媽，只因自己自私不像媽媽般偉大，又指老公杜汶澤亦未成長：「男人係唔會大，年紀會大但未係成熟。（佢公開為拖糧道歉，成熟咗？）冇回應，要處理都處理咗。（佢有冇拖你家用？）冇，我哋財政好獨立！」