陳柏宇父女交換口水
歌手陳柏宇（Jason）昨日現身新城為主持的新節目《We Love We Play》造勢，他表示非首次做DJ，不過就自嘲個腦快過把口，經常愈講愈遠：「所以唔可以自己一個做，要有其他人帶領住，天生係好易唔記得自己講過咩。（有冇試過應承老婆啲嘢唔記得？）有，試過唔記得佢生日。（點補鑊？）補祝番再寫首歌，自己唔太會慶祝節日。」
講到日前愛女Abigail發燒，Jason指被她傳染：「佢一發燒我就喉嚨痛，可能佢食完自己手指就伸入我個口度間接性傳染，佢成日當咗我個口係扶手，我合埋口佢就會撬開，又試過插我眼，呢兩日我負責氹佢瞓，可以獨佔佢就變得好黐我。（老婆呷醋？）佢話叫公司畀多啲大陸嘢我做！」