周家蔚Freestyle戰肥媽醉到斷片
ViuTV正式向無綫宣戰！昨日起推出一系列新節目硬撼無綫黃金時段作品，周家蔚與劉永健主持的飲食節目《友枱VIP》，跟無綫由肥媽和陸浩明主持的長壽節目《食好D 食平D》撞到正，家蔚一於少理，揚言以嘉賓做賣點搶收視！
藝人周家蔚昨日現身電台宣傳新時段飲食節目《友枱VIP》，講到無論節目形式、播出時間都與肥媽的節目正面交鋒！問到可有信心擊敗對手，她卻懵然不知對撼一事：「係咩？我唔知……烹飪方面真係冇乜信心，我哋着重傾偈多過煮嘢食，係聽內容多過學煮嘢食，會有啲新意、畀到啲煮食Tips大家，共10集、播兩個星期。（節目名同無綫個《今日VIP》好似。）我唔知喎！唔係我作。」
嘉賓天華爆內幕
家蔚信心十足的說靠嘉賓取勝，透露首集由陶大宇及郭政鴻打頭陣，又大爆眾人飲醉酒：「好Freestyle嘅真實節目，個個都飲多咗，我第二日起身已經唔記得咗個尾聲，斷晒片！以前喺TVB拍嘢會好謹慎，但呢個節目就好似喺屋企請朋友嚟飲酒食飯，嘉賓都盡興暢談。」又預告下集嘉賓是「Laughing哥」謝天華，他在節目中透露拍《神鎗狙擊》邊攀石邊聽電話一幕，原來由他構思，未料成為熱話。
追豬B未達成共識
問會否與一對囝囝準時收看？家蔚笑言囝囝8點就瞓覺，內容亦不太適合他們，而老公洪天明在內地與老爺洪金寶及洪天祥、洪天照一起拍戲：「細仔JT尋日生日，天明都冇嚟開Party，但預先送咗禮物。」早前兩口子與一大班朋友去日本賞櫻，她笑言已當與天明二人世界：「平時同啲仔瞓，去旅行嗰幾晚唔使畀佢哋踢！」之後他們會去柬埔寨。一直恨生豬B的家蔚講到造人計劃：「天明未Ready，佢話想遲啲，但遲啲我又未必想。人哋話生女好冧，細仔成個女仔咁，又窩心又嗲，天明當咗佢係女！」
