惠英紅乞人憎被問幾時死！
惠英紅昨晚設宴慶祝早前奪得電影獎項，最近她主演的無綫劇集大受歡迎，直認其角色乞人憎，出街時不少人邊鬧她邊索合照，更有網友問她「幾時死」，可見角色非常入屋。
早前惠英紅連奪香港電影金像獎及亞洲電影大獎最佳女配角，昨晚她筵開八席宴請圈中朋友、媒體及贊助商慶祝，她說得獎後有連串工作，有些是得獎前接下，故沒有加價，更自稱薪酬超偏低：「片酬唔好買餸咁拉拉扯扯講價，如果我開到好高，開唔到戲就唔好，最緊要尊重，希望皆大歡喜。（下一個計劃結婚？）同你哋冇咩關係喎！你唔畀我已經嫁咗呀？（私生子都有埋？）女就有一個（意指愛犬）！其實現階段好開心，唔心急啦！」
唔Like畀人話老
她主演的熱播劇《鐵探》尚餘十集大結局，她直言對收視有信心，不擔心與鄭少秋主演的ViuTV劇集對撼：「我哋播咗廿集，大家都習慣咗睇，佢嗰套就上網再睇番啦！（你個角色成日畀人鬧喎！）係呀！前兩晚我落街放狗，後面有人好惡嗌『萬晞華』！我擰轉頭，佢就話『我好支持你呀！』又有內地網民鬧我老毒婦，問我幾時死，鬧毒都算，做咩鬧我老喎！不過呢十年我都未試過咁入屋，出街好多人送嘢畀我又合照，好開心。」對於之前她劇透細仔楊明會繼長子洪永城後身亡，她不擔心觀眾不滿：「我對自己演繹有信心，即使知道咗再睇都會鍾意。」
陳志健如中六彩
在《鐵》劇飾演惠英紅心腹「伍警司」的陳志健，對上司言聽計從，被網民封為「小伍子」，他直言能跟惠英紅日夕相對感榮幸，如中六合彩！至於劇中幾位奸角楊潮凱、方紹聰、羅浩銘、林敬剛及蔣祖曼接受節目訪問，羅浩銘笑言要投訴是劇中唯一冇感情戲的演員。