洪卓立騷肌搣甩孱樣大平反
歌手洪卓立（Ken）、泳兒、王灝兒（JW）、菊梓喬及連詩雅等，昨日出席《全城躍動第七屆全港運動會開幕典禮》，Ken和泳兒穿情侶裝亮相。講到做運動，泳兒笑言別看她外表纖瘦，其實會玩瑜伽和游水，在旁的Ken即笑說：「咁我係運動白癡，又唔做運動，又孱弱！」
6月開騷「交功課」
近年見Ken都有做健身，問到是否真的零運動？他說：「其實都困擾，因為至今仲有人問我身體點？好番未？佢哋仲停留喺5、6年前對我嘅諗法，惟有睇吓有乜機會改變大家！」言下之意是否除衫晒Body？他說：「操好少少肌肉先，有啲紋（線條）畀大家睇吓。」續指想增磅變大隻仔，問到何時騷肌示人？他說：「睇進度啦！」
Ken又指6月會在內地舉行演唱會，希望屆時可以騷上半身的成績。泳兒笑言期待看到他的泳褲造型，至於問她會否騷事業線？她笑說：「我長期都有騷吓喎，但有時都要錫身收埋。」
阿田幫吳業坤影裸照
同場的田蕊妮被問到在吳業坤個唱上播出的短片中，踢爆坤坤當年約她單獨食飯，去到才知道要陪他慶生，她笑說：「當年《超級巨聲2》我哋建立咗好深厚嘅感情，佢又好感激我，咪約我食飯囉，又真係冇諗過會叫我同佢慶生嘅，唔怕單獨對佢，因為佢點都唔夠我打！」提到坤坤成功練出腹肌，她大讚厲害，並提議他拍全祼寫真留念，問到是否由她操刀？她笑言可以，但要坤坤遮住重要部位。