蔚雨芯「初吻」留畀彭于晏
擁「魔鬼胸」的蔚雨芯剛踏入25歲人生轉捩點，雖入行多年，她仍保留螢幕初吻，希望獻給「男神」彭于晏。形象性感的她自嘲一隻「兵」都冇，自認傳統，對自己入行後仍能潔身自愛引以為傲。
蔚雨芯（Rainky）剛與舊公司完約，暫以個人身份發展，據知有幾間電影及唱片公司向她招手，但她不心急決定，唱歌出身的她對拍戲興趣漸濃，未來會以拍戲為主，又自爆出道至今從未「Kiss」過：「我拍唔到床戲，會尷尬，如果有kiss戲都要睇劇情係咪有需要，始終螢幕初吻嘛！以前喺電影《微交少女》最多都係好性感瞓喺床，冇錫冇動作，啲親熱戲係替身拍嘅。（螢幕初吻想畀邊個？）彭于晏，冇第二個可以令我個心卜卜跳。」
讚舒淇湯唯性感
有「魔鬼胸」稱號的她形象性感，她說：「嚟緊係咪會零性感？未必，可能為套戲會性感嘅，始終出過寫真集，又有呢個朵，我冇唔鍾意，只係唔希望大家將焦點放喺我性感方面，希望慢慢努力得到大家認同。」談到心目中的性感女神，她即選舒淇及湯唯，表示非常欣賞二人，讚她們好正。
有定力冇學壞
她自嘲性格男仔頭：「入行以嚟緋聞唔多，我呢一生人一隻兵都冇，只係拍過兩次拖。」對於被爆有馬來西亞籍「超級富二代」男友，她笑說：「佢係我好閨蜜，係好朋友。我喺感情上好專一，係好傳統嘅女仔。（娛圈畀人話係大染缸？）我冇壞到囉！好proud of呢樣嘢，細個時啲親戚都驚我學壞，但我好潔身自愛，比較有定力，亦好緊張人哋點睇我，無時無刻都要將自己做得最好，尤其公眾人物要檢點！」