袁偉豪楊明入礦洞 被飛擒大咬周身痕
藝人袁偉豪（Ben）與楊明到哥倫比亞拍攝節目，首次做礦工的二人，被昆蟲咬到全身一粒粒，痕癢非常，要睇醫生診治。他倆又訓練當地參加選美的美女，Ben大讚她們「應有盡有」。
楊明、袁偉豪現時於南美哥倫比亞拍攝無綫節目《打工捱世界3》，在首都波哥大，參與人生第一次採礦，楊明說：「前往波哥大礦洞要搭六個鐘頭車，落到200米深嘅礦洞，用電鋤鑿牆，一鑿就好多黑色灰塵飛出嚟，裏面又深又黑又濕，危險就冇乜，但畀啲唔知昆蟲定蝨咬，拍完先發覺咬到成身都係，所有工作人員都有過敏反應，監製即刻喺當地搵醫生，真係好痕！」他的左、右手各有逾廿粒紅疹，雙腳、背脊也各有十幾粒。
培訓靚女最開心
Ben表示18日的行程要坐11程飛機：「同幾年前拍第一輯比較，體力真係冇咁好，舟車勞頓好易攰，而且去呢啲國家，每日都要食藥，食完後身體會有反應，作嘔作悶，最辛苦係去做礦工，礦洞空氣唔流通，都幾辛苦，所以好敬佩啲採礦工人。」不過，他指此行較輕鬆的是拍攝準備選美的哥倫比亞佳麗，當地一年有四百多場選美會，女孩自小已為選美做準備，他說：「嗰度有咖啡小姐、模特兒小姐、花生小姐選舉，真係乜選美都有，我哋就Training佢哋，佢哋全部都好靚，輪廓鮮明，應有盡有！」他倆於麥德林市創作了人生第一幅街頭Graffiti（塗鴉），又到貧民山區做義工，跟小朋友踢波及煲湯，相當有意義。
