李明蔚新療法昂貴賣CD籌款
前歌手李明蔚雖然患癌但未有洩氣，昨更到上環出席信仰及心路歷程分享會。病情令她面癱及失聲，訪問時要由好友白倩蘭「聲音導航」，分享會的場外有出售她以往的歌曲CD，為即將接受的昂貴新治療法籌款。談到新治療，明蔚透露：「冇其他嘢可以做到，所以想試吓。要連續打三支針，每支四萬，未知有冇效，如果試過OK會繼續。頭三支可以支付到，我都有做手工藝賺錢。」
她為今次布道會籌備了三個月，由稿件至揀歌都出自其主意，希望喚起大眾愛惜生命。白倩蘭讚明蔚內心健康：「比起好多港人身體雖健康但精緒有病，佢嘅表現真係好堅強，而且打理得自己好好，又食健康食物令精神好啲。」