倪晨曦封咀寧做癲婆
藝人倪晨曦、蘇玉華、潘燦良以及毛舜筠前晚出席品牌晚宴酒會，穿上超Deep V晚裝的倪晨曦笑指未婚夫大方：「工作上健康性感佢OK嘅，但條裙佢未睇過。（介意你拍咀戲？）呢樣佢就唔接受，所以我都考慮過，有啲戲唔一定講拍拖，或者可以演癲婆。（婚禮籌備成點？）應該今年底簽字，同屋企人食餐飯，希望婚禮喺外地舉行，請朋友去。（加拿大搞？）可能o架！」她自言是工作狂，婚後會繼續工作。
潘燦良懶結婚
早前潘燦良在金像獎失落「最佳男配角」，問蘇玉華有否「錫番」？他笑言有：「但我冇唔開心，都話21年前有提名冇出席係遺憾，今次好似去主題樂園咁玩咗晚。」蘇玉華笑言最開心是她，因為早前與袁富華兩Pair人一齊食飯，明言誰得獎誰請食飯，無論如何她都有餐食。談到結婚，她笑指袁富華提議兩Pair「一齊結」，惟潘燦良反對：「分開玩兩日嘛。（有計劃？）不嬲都有，不過懶之嘛！」《逆流大叔》正計劃原班演員拍新片，他期待有機會與袁富華鬥戲。
