黃心穎羞愧認錯 馬國明嬲飽變擔心

黃心穎「偷食」人夫許志安後一直潛水，直至昨午，黃心穎終在社交網回應事件：「對不起，我做錯了。是我做了非常錯誤、難以令人原諒的事，感到十分羞愧、歉疚。我在此向所有受事件影響及受到傷害的人誠心由衷道歉。犯下如此嚴重的過錯，我無法面對自己，也不知道怎樣去面對家人、馬明、朋友、公司、同事……不敢奢求大家的原諒，只懇求大家能給予所有受牽連的人一點空間。我認真反省自己的過失，接受懲罰承擔後果。再一次，『對不起大家』。」似乎還未有心理準備面對大眾。

「驚佢未平靜講錯嘢」

另邊廂，原以為馬國明會以「受害者」姿態現身，但他昨日卻以「真男人」器量出來面對大眾，他揸車返電視廣播城化妝開工，於停車場泊車時，有同事為他打氣，他亦展露笑容。他接受傳媒訪問時，表現相當冷靜，更大愛到處處維護心穎：「其實呢件事我知道後，好快冇咗嬲呢個感覺，我係好平靜，同埋好快變成擔心，擔心件事牽涉嘅所有人，任何一個受到傷害我都唔希望，我唯一可以代表佢（黃心穎）講少少嘢，佢知自己做錯咗，知佢好想出嚟同大家講，但公司都驚佢未平靜會講錯嘢，我知佢IG講咗嘢，我只可以話佢好年輕，未來仲有好多路要行，希望大家畀啲空間佢，大家亦唔使擔心我，我都會照專心工作，拍好我嘅戲，安仔都講咗嘢，我亦唔會發表任何意見，呢個世界冇人有資格發言，除咗安仔太太外，冇人有資格發言，呢件事盡快平息就算喇！」

「受害者」之一馬國明處處維護心穎。

雙手合十的馬國明望事件勿再發酵，令更多人受傷害。

避談「分手」

他亦請大家不要採訪父母，指他們不是圈中人，希望不要將母親的說話放大：「只希望大家唔好嚇親屋企，我只可以講咁多，嚟緊我只會做好自己嘅嘢，希望大家高抬貴手，唔好將件事再發酵令到更多人受傷害。」追問與心穎關係及有否分手，他只說：「我諗我冇嘢要再講喇！」態度大方，之後他駕車到土瓜灣的大廈拍外景，等埋位期間，他跟工作人員有傾有講，沒因感情事影響工作。

馬國明在土瓜灣的大廈天台拍劇至晚上。

「偷食」女主角黃心穎昨在網上蒲頭，發文稱「對不起大家」。

另外，昨晨無綫助理總經理（藝員管理及發展）樂易玲表示前晚跟黃心穎和馬國明聯絡，指她好後悔、感到對不起男友馬國明：「呢一刻佢嘅情緒仍未平復，公司覺得佢需要休息一段時間。」

至於黃心穎的胞姊黃心美被網民發現在Ig上unfollow細妹，似是想跟對方劃清界線，網民直指兩姊妹反目，連家人都幫理不幫親，但被網民發現後，她立即follow番心穎，疑似害怕被網民指姊妹情斷。