陳煒否認揭浩信心穎拖手

黃心穎被爆咀爆許志安後,網上隨即瘋傳一段女性聲音短訊,更直指該人是陳煒,而該聲音內容如下:「嗰時同萬綺雯返大陸拍劇集《東坡家事》,都見佢(心穎)同王浩信拖手,又成日黐埋佢度,肯定有景轟啦!有次宣傳,心穎仲同萬綺雯講啱啱先去完蘭桂坊飲完酒,當時都知係Wet妹玩玩吓,佢同馬國明都唔慌耐,肯定係貪馬國明傻吓傻吓咁啦!」

對於成為嫌疑人物,陳煒昨日火速回應澄清:「都知呢件事,識我嘅人都知我把聲同語氣唔係咁(口架)啦!所以我都唔需要去解釋,成件事假嘅。」事後亦有指該短訊聲音是藝人王綺琴,但她否認。

至於被指遭拖手的王浩信則回應說:「嗰位同事我諗誤會咗嘞!我喺《東坡家事》同心穎係飾演一對夫妻嘅,見到我哋翹手同拖手嘅動作,都係排緊戲同做緊戲嘅時候,喺戲外絕對冇呢啲事發生。」